འཕགས་པ་ཐོགས་མེད།
༄༅ ། །འཕགས་པ་ཐོགས་མེད་ནི།
བྲམ་ཟེ་མོ་གསལ་བའི་ངང་ཚུལ་མ་ཞེས་པ་ཐེག་ཆེན་དར་ཕྱིར་རྒྱལ་རིགས་དང་འཕྲད་པ་ལས་སྐུ་འཁྲུངས་ཤིང་། སྐུ་ཆུང་དུས་ནས་བསྟན་པ་ལ་ཞུགས་ཏེ་མཁས་པར་གྱུར་ཅིང་། སློབ་དཔོན་ཨརྷ་ཏ་ལས་སྒྱུ་དྲའི་དབང་མནོས་དུས་མེ་ཏོག་བྱམས་པ་ལ་ཕོག་པས་རི་བོ་བྱ་རྐང་ཅན་དུ་ལོ་བཅུ་གཉིས་ཀྱི་བར་བསྒྲུབས་ཤིང་། གྲོང་ཁྱེར་ཨུ་ཙནྟ་དང་ཉེ་བར་ཁྱི་མོ་སྨད་འབུས་ཁྱེར་བ་ཞིག་ལ་སྙིང་རྗེ་དྲག་པོ་སྐྱེས་པ་ལ་བརྟེན་ནས་བྱམས་པའི་ཞལ་གཟིགས་ཤིང་། དགའ་ལྡན་དུ་ཁྲིད་ནས་མི་ལོ་ང་གསུམ་རིང་བྱམས་ཆོས་གསན་ཏེ་ཕྱིར་བྱོན། མ་ག་དྷའི་པི་ལུ་པ་ནའི་ནགས་སུ་ཆོས་ཀྱི་མྱུ་གུའི་དགོན་པར་རྒྱུད་བླའི་འགྲེལ་བ། རྒྱན་དང་ཉི་ཁྲི་སྦྱར་བའི་དེ་ཉིད་རྣམ་ངེས། བྱམས་ཆོས་སྤྱིའི་དོན་འགྲེལ་དུ་ས་སྡེ་ལྔ་དང་སྡོམ་རྣམ་གཉིས་མཛད། ཁྱད་པར་དུ་ས་སྡོམ་གྱིས་སེམས་ཙམ་དར་རྒྱས་མཛད་དེ་ཤིང་རྟའི་སྲོལ་ཕྱེ།
སྐུ་ཚེ་དེར་ས་གསུམ་པ་བརྙེས་ཏེ་སྐུ་ལ་མཚན་དཔེ་རྗེས་མཐུན་པས་བརྒྱན་པ་བྱུང་། ཕྱིས་རྒྱལ་པོ་ཟབ་མོ་ཕྱོགས་ཀྱིས་སྤྱན་དྲངས་ཏེ་དྲི་བ་མང་པོ་ལ་ལན་གནང་བས་དད་དེ་ཆོས་གཞི་ཉེར་ལྔ་བཙུགས། ལྷ་ཁང་དང་མཆོད་རྟེན་བརྒྱ་ཕྲག་མང་པོ་བཞེངས་ནས་ཐེག་ཆེན་དར་བར་མཛད།
སྐུ་ཚེ་སྨད་དུ་ན་ལེནྡྲར་ལོ་བཅུ་གཉིས་བཞུགས། མུ་སྟེགས་ཀྱི་རྒོལ་བ་མང་པོ་ནང་པར་བཙུད། ཐེག་ཆེན་པའི་དགེ་ཚུལ་སློང་ཁྲི་ལྷག་འདུས་པ་ལས་ཐེག་ཆེན་ཀླུ་སྒྲུབ་ཀྱི་དུས་ལས་ཀྱང་རྒྱས་པར་མཛད་དོ། །དགུང་ལོ་བརྒྱ་དང་ལྔ་བཅུ་ ༼ ཕྱེད་ལོ ༽ཉེ་བར་བཞུགས་ནས་མཐར་རྒྱལ་པོའི་ཁབ་ཏུ་མྱ་ངན་ལས་འདས། བསྟན་པ་འདི་ལ་མང་དུ་བརྩམས་པའི་མཆོག་ཐོབ།
༄༅ ། །བྱམས་པས་རྗེས་བཟུང་ཐེག་ཆེན་སྡེ་སྣོད་ཀུན༎ ལེགས་པར་སྤེལ་མཁས་རྒྱ་ཆེན་ལམ་སྟོན་ཞིང་༎ རྒྱལ་བའི་ལུང་བཞིན་རྣམ་རིག་ཤིང་རྟའི་སྲོལ༎ འབྱེད་མཛད་ཐོགས་མེད་ཞབས་ལ་གསོལ་བ་འདེབས༎
ཤོས་ངོས་འདིའི་དཔྱད་གཞིའི་ཡིག་ཆ་ཁག་ཅིག མཚོ་སྔོན་མི་རིགས་དཔེ་སྐྲུན་ཁང་གིས་པར་དུ་བསྐྲུན་པའི་བོད་བརྒྱུད་ནང་བསྟན་ལྷ་ཚོགས་ཆེན་མོ།
འཇིགས་མེད་ཆོས་ཀྱི་རྡོ་རྗེ་ལགས་ཀྱིས་སྒྲིག་རྩོམ་བྱས་པ་ལས་ཟུར་འདོན་བྱས།