༄༅ ། །ངེས་དོན་རིགས་པའི་དབང་་ཕྱུག་རྒྱལ་སྲས་ཞི་བ་ལྷ་ནི།
རྒྱ་གར་ནུབ་ཕྱོགས་ཀྱི་ཡུལ་འཁོར་མོ་བཟང་ཞེས་པར་ཡབ་རྒྱལ་པོ་དགེ་བའི་གོ་ཆའི་སྲས་སུ་སྐུ་འཁྲུངས་ཏེ་མཚན་ཞི་བའི་གོ་ཆར་བཏགས་ཤིང་། དགུང་ལོ་དྲུག་པར་རྗེ་བཙུན་འཇམ་པའི་དབྱངས་བསྒྲུབས་ནས་གྲུབ་སྟེ་ཞལ་གཟིགས་ཤིང་གདམས་པ་ཐོབ། ཡབ་ཀྱིས་རྒྱལ་སྲིད་དུ་འགོད་པར་རྩོམ་པ་ན་རྗེ་བཙུན་སྒྲོལ་མས་བྱིན་གྱིས་བརླབས་ཏེ་རྗེ་བཙུན་འཇམ་དབྱངས་རྣལ་འབྱོར་པ་ཞིག་ཏུ་སྤྲུལ་པའི་དྲུང་དུ་ཁྲིད། བྱང་ཆུབ་ཀྱི་སེམས་བཅོས་མ་མ་ཡིན་པ་ཐུགས་རྒྱུད་ལ་འཁྲུངས། ཤར་ཕྱོགས་ན་རྒྱལ་པོ་སེངྒེ་ལྔ་བ་ཞེས་པའི་གདུག་རྩུབ་ཅན་ཞིག་ཡོད་པའི་སྐུ་དྲུང་དུ་བློན་པོ་བྱས་ཏེ་རྫུ་འཕྲུལ་གྱིས་བཏུལ། པཎྜི་ཏ་རྒྱལ་བའི་ལྷ་ལས་རབ་ཏུ་བྱུང་སྟེ་ཞི་བ་ལྷ་ཞེས་གསོལ།
པཎྜི་ཏ་དེ་དང་རྗེ་བཙུན་འཇམ་པའི་དབྱངས་ལས་ཆོས་གསན་ཏེ་མཁས་པར་གྱུར། ཏིང་ངེ་འཛིན་བསྒོམས་པས་ས་ལམ་མཐོན་པོར་གཤེགས། མངོན་ཤེས་དང་རྫུ་འཕྲུལ་ལ་མངའ་བརྙེས། ཕྱི་ཚུལ་དུ་འདུ་ཤེས་གསུམ་པ་པའི་ཚུལ་བསྟན་པར། དགེ་སློང་མངོན་ཤེས་མེད་པ་རྣམས་ཀྱིས་གནས་ནས་སྐྲོད་འདོད་ཀྱིས་ན་ལེནྡྲའི་དགེ་འདུན་ཐམས་ཅད་ཀྱི་དབུས་སུ་གདན་ཁྲི་ཆེས་མཐོན་པོ་འཛེག་མི་ཐུབ་པ་ཞིག་བྱས་ཏེ་ཆོས་འཆད་པར་བསྐུལ་པ་ན། གདན་ཁྲི་ཕྱག་གིས་མནན་ཏེ་རན་པར་བྱས་ནས་ཁྲི་ལ་འཁོད་དེ་རྒྱལ་སྲས་སྤྱོད་འཇུག་གསུངས། གང་ཚེ་དངོས་དང་དངོས་མེད་དག །ཅེས་པའི་མཚམས་ནས་ནམ་མཁར་འཕགས་ཏེ་གསུངས་མཚམས་མ་ཆད་པར་གྲོང་ཁྱེར་ཀ་ལངྐར་བྱོན། དེ་ལ་ན་ལེནྡྲས་གདན་དྲངས་ཀྱང་མ་ཕེབས་པར་སྤྱོད་འཇུག་གི་གཞུང་ཚད་དང་། བསླབ་བཏུས་ཀུན་བཏུས་ གཉིས་ཀྱི་མ་ཕྱི་གང་དུ་ཡོད་པ་གསུངས། ཡུལ་དེར་ཡང་སྔགས་ཀྱི་སྤྱོད་པ་མང་པོ་བསྟན། ལྷོ་ཕྱོགས་སུ་བྱོན་ཏེ་མུ་སྟེགས་པ་རྣམས་རྩོད་པ་དང་རྫུ་འཕྲུལ་གྱིས་ཕམ་པར་བྱས་ཏེ་བསྟན་པ་ལ་བཙུད་པས་ས་དེར་མུ་སྟེགས་ཕམ་པའི་ཡུལ་ཞེས་གྲགས།
ཉམ་ཐག་པའི་འགྲོ་བ་རྣམས་ལ་རྫུ་འཕྲུལ་གྱིས་ཁ་ཟས་སྩལ་པ་སོགས་ངོ་མཚར་བའི་རྣམ་ཐར་བཅུ་བདུན་གྱི་བདག་ཉིད་ཅན་ཏེ། མདོར་ན། བྱང་ཆུབ་ཀྱི་སེམས་དང་ལྟ་བ་རྣམ་པར་དག་པས་གསང་སྔགས་ཤིན་ཏུ་སྤྲོས་མེད་ཀྱི་སྤྱོད་པ་ལ་གནས་པ་དང་། ཁྱད་པར་དམ་པའི་ཆོས་ཀྱི་ཡང་སྙིང་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་རིགས་པའི་སྒོ་ནས་འཆད་པ་ལ་གཞན་དང་མི་འདྲ་བའི་ལེགས་པར་བཤད་པའི་བདག་ཉིད་ཆེན་པོ་འགྲན་ཟླ་དང་བྲལ་བའོ།།
༄༅ ། །ངོ་མཚར་རྨད་བྱུང་སྙིང་རྗེ་ཆེན་པའི་ལམ། །ཟབ་དང་རྒྱ་ཆེའི་རིགས་ཚུལ་རྣམ་མང་གིས། །སྐལ་བཟང་གདུལ་བྱའི་ཚོགས་ལ་སྟོན་མཁས་པ། །རྒྱལ་སྲས་ཞི་བ་ལྷ་ལ་གསོལ་བ་འདེབས། །
ཤོས་ངོས་འདིའི་དཔྱད་གཞིའི་ཡིག་ཆ་ཁག་ཅིག མཚོ་སྔོན་མི་རིགས་དཔེ་སྐྲུན་ཁང་གིས་པར་དུ་བསྐྲུན་པའི་བོད་བརྒྱུད་ནང་བསྟན་ལྷ་ཚོགས་ཆེན་མོ།
འཇིགས་མེད་ཆོས་ཀྱི་རྡོ་རྗེ་ལགས་ཀྱིས་སྒྲིག་རྩོམ་བྱས་པ་ལས་ཟུར་འདོན་བྱས།