༄༅། །སློབ་དཔོན་ཆོས་ཀྱི་གྲགས་པ་ནི།
ལྷོ་ཕྱོགས་དྲི་མ་ལ་ཡར་བྲམ་ཟེ་མུ་སྟེགས་ཀུན་ཏུ་རྒྱུ་ཞིག་གི་བུར་འཁྲུངས་ཏེ་རིག་བྱེད་དང་མུ་སྟེགས་ཀྱི་གཞུང་ལ་མཁས་པར་གྱུར། ཕྱིས་དཔལ་ལྡན་ཆོས་སྐྱོང་ལས་རབ་ཏུ་བྱུང་། སྡེ་སྣོད་གསུམ་ལ་མཁས་ཤིང་། མདོ་དང་གཟུངས་ལྔ་བརྒྱ་ཐུགས་ལ་བཟུང་། སློབ་དཔོན་དབང་ཕྱུག་སྡེ་ལས་ཚད་མ་ཀུན་བཏུས་ཚར་གསུམ་གསན་པས་ཕྱོགས་གླང་གི་དགོངས་པ་མ་ལོན་པར་མཁྱེན། དེ་ཚེ་བླ་མས་ཀུན་བཏུས་ཀྱི་འགྲེལ་རྩོམ་པར་བསྐུལ་པ་ལྟར་ཚད་མ་སྡེ་བདུན་མཛད་དེ་ཚད་མའི་གཞུང་གི་བདག་པོར་གྱུར། ཧེ་རུ་ཀའི་ཞལ་གཟིགས་ཤིང་ཕྱོགས་ལས་རྣམ་པར་རྒྱལ་བའི་དངོས་གྲུབ་ཐོབ།
ཕྱི་རོལ་པའི་རྒོལ་བ་སྟོང་ཕྲག་ལྷག་རྩོད་པས་ཕམ་པར་བྱས་ཏེ་བསྟན་པ་ལ་བཙུད། ཁྱད་པར་དུ་གཞོན་ནུ་རོལ་བ་དང་། སི་ག་ར་ཨརྱ་སོགས་མུ་སྟེགས་པ་ཆེས་ཆེན་པོ་རྣམས་རྩོད་པས་ཕམ་པར་བྱས་ཏེ་ནང་པར་བཅུག་པ་དང་། ཆོས་གཞི་བརྒྱ་ཕྲག་བཙུགས། སི་ག་རས་སློབ་དཔོན་གྱི་ཚེ་གཅིག་པོར་སྐྱེ་བ་གསུམ་བླངས་ཏེ་བརྩད་ཀྱང་ཕམ་ནས་ནང་པར་ཞུགས། ཆོས་ཀྱི་རྒྱལ་རྔ་ལན་བཅུ་བདུན་དུ་བརྡུངས་པར་གྲགས། བསྟན་པ་འདི་ལ་སྨྲ་བའི་མཆོག་བརྙེས། མཐར་ཀ་ལིངྒར་འདས་ནས་གདུང་བཞུགས་པ་རྡོའི་རང་བཞིན་གྱི་གོང་བུ་གཅིག་ཏུ་གྱུར་ཏོ། །
དེ་ཡང་། ཤེས་རབ་ཅན་ནི་ཕྱོགས་ཀྱི་གླང་པོ་སྟེ། །ཙནྡྲ་གོ་མི་རྗོད་པ་རྣམ་པར་དག །སྙན་ངག་དཔའ་བོ་ལས་བྱུང་སྡེབ་སྦྱོར་མཁས། །མེ་ཏོག་ཀུན་ཏུ་རྒྱས་པ་ལོངས་སྤྱོད་ལྡན། །ཕྱོགས་ལས་རྣམ་པར་རྒྱལ་བ་ང་མིན་སུ། །ཞེས་གསུངས་པ་ལྟར་རོ།།
༄༅། །ཕྱི་ནང་ཚད་མའི་གནད་ཀུན་ལེགས་དགོངས་ཤིང་། །མདོ་སེམས་ཟབ་རྒྱས་ལམ་ཀུན་རིགས་ལམ་ནས། །ངེས་སྟེར་རྨད་བྱུང་ཆོས་ཚུལ་འདོགས་མཁས་པའི། །ཆོས་ཀྱི་གྲགས་པའི་ཞབས་ལ་གསོལ་བ་འདེབས། །
ཤོས་ངོས་འདིའི་དཔྱད་གཞིའི་ཡིག་ཆ་ཁག་ཅིག མཚོ་སྔོན་མི་རིགས་དཔེ་སྐྲུན་ཁང་གིས་པར་དུ་བསྐྲུན་པའི་བོད་བརྒྱུད་ནང་བསྟན་ལྷ་ཚོགས་ཆེན་མོ།
འཇིགས་མེད་ཆོས་ཀྱི་རྡོ་རྗེ་ལགས་ཀྱིས་སྒྲིག་རྩོམ་བྱས་པ་ལས་ཟུར་འདོན་བྱས།